أمير عيد: الأرقام عمرها ما كانت معايير نجاح الفنان.. الجمهور هو المقياس

تحدث النجم أمير عيد، خلال حفل فريق كايروكى فى ختام مهرجان العلمين فى دورته الثالثة أمس الجمعة، عن الأرقام والمشاهدات المسيطرة حاليا، وعن السوشيال ميديا، ونصيحة والدته له.وقال أمير عيد فى كلمته: "عشان أكون صريح يعنى الأرقام عمرها ما كانت معايير الفنان جامد وغير جامد و الحقيقة مش بفهم ليه الناس مهوسه أوى بفكرة الأرقام أكثر مشاهدة أكثر أرقام أكثر متابعة و أعتقد لو بيدل على شئ أن الشخص فاضى من جوه و بيحب يملئ من بره"وتابع: "وعلى العموم الحاجات الرخيصة هى أكتر حاجه بتتباع ولذلك الأرقام احيانا ممكن تبقى دليل على الرخص والناس بتتباهى بالزيادة بالفلوس و العربيات و الساعات و أفتكر مرة أمى قالت ليا " عمرك ما هتبقى شخص غنى إلا لو أنت عندك حاجه الفلوس مش بتشتريها".

وأضاف: "دلوقتى السوشيال ميديا بتحسسنا أن إحنا مش عايشين وتشوف ناس عامله نفسها مبسوطين و فرحانين دى مش ناس حقيقة وللجمهور أنتوا ناس حقيقة، وعاوز أقول حاجه و أنا جاى من القاهرة للحفلة ناس كتير فى الطريق طالعوا ليا تذاكر فى العربية و بيسلموا عليا وعندهم حماس شديد جدا والموضوع عمره ما كان بالعدد الموضوع فى الروح اللى هما بيدهولنا، حتى الحضور لو كان نصف العدد أو 10 أشخاص كنت هبقى فخور و هعمل نفس الحفلة بالظبط، المهم ليس بالكم ولكن بالقيمة".